LA PUPA
di Lina La Mattina
“Mà pi morti accattamilla ‘na pupa:
la vogghiu cu la vesta e lu cappeddu di sita
chi grapi e ‘nchiudi l’occhi
parra, chianci e camina cu la corda!”
Io ascutava stunata cchiù d’un purpu
‘stu discursu e mi faceva rabbia e tinnirizza…
“ma no ‘a matri - ci dissi –
accussì nun ti la pozzu accattari…!”
“Io lu sapìa mà – arrispunniu ‘nfuriata –
tu nun sì comu la matri di la me’ cumpagna
ca cci accatta tuttu chiddu ca voli a so’ figghia
io ‘nveci, l’haju sempri addisiari li cosi!”
Palori chi scattianu comu trona nni la menti
palori di ‘na figghia di deci anni
ca nun sapi comu si po’ sfunnari
spirtusari, spaccari, lu cori di ‘na matri…
Siddu io putissi figghia mia
t’accattassi puru lu celu chinu di stiddi
nuddu cchiù di mia sapi chi voli diri…
” addisiari ‘na pupidda…”
Lu pinzeri è un gran viaggiaturi
e lestu è già ddà a ddu jornu di trent’anni fa:
“Mà accattami ‘u pani staju murennu di fami”
“Nun pozzu a matri lu sai picciuli nun n'haju!”
E comu puteva io addumannari la pupa
siddu nun aveva mancu lu pani?
Agghiuttennu pitittu pigghiai ‘na pezza
l’attummuliai e fici ‘na testa
ci attaccavu gammi e vrazza
ci arraccamavu l’occhi e la vucca…
“Ma chi sta’ facennu? - jttò vuci me’ matri –
affacciannusi nna lu biancu scaccheri
d’unni io assittata ‘mmenzu li scaluna di marmu
a deci anni m’invintava un misteri…
“Jecca ddocu ca pari ‘na magarìa!”
ma io cuntenta arrispunnivu:
“è ‘na pupa, ora ci fazzu la vesta!”
Cusà quali pena dintra lu so’ cori…
“Mà , accattamilla ‘sta pupa nova…”
mi scoti di li rigordi la vuci vuncia di chiantu
“si si ciatuzzu miu, ma tu nun chianciri
e fa la brava ca pi morti t’arrialu tuttu chiddu ca voi!”
26 ottobre 1980
1° PREMIO ASSOLUTO "MARINEO" SEZ. INEDITI 1981
Tratta dal volume "CHIDDU CA NUN SI VIDI" di LINA LA MATTINA
1° PREMIO ASSOLUTO " MARINEO" SEZ. EDITI 1996
